المولد يفصل بسبب الحرارة والمياه كاملة: الأسباب
يا إما المحرك سخن فعلًا، يا إما القراءة غلط — أول خطوة إنك تعرف أنهي واحدة.
الإجابة باختصار
ليه المولد بيفصل حرارة والمياه كاملة؟
فيه احتمالين. سخونة حقيقية: ردياتير مسدود، سير مروحة مرخي، هوا سخن بيرجع للغرفة، ثرموستات معلّق، أو طلمبة مياه ضعيفة. أو قراءة غلط: حساس تالف، سلك عامل شورت على الأرضي (وده بيتقرا سخن جدًا)، أو نوع حساس غلط مضبوط في الكنترول. قيس الحرارة بترمومتر مستقل وقارنها بقراءة الكنترول عشان تعرف أنهي احتمال.
الكنترول وقّف المولد على "High Coolant Temperature" ومستوى المياه في الردياتير مظبوط. فيه احتمالين بس: المحرك سخن فعلًا لسبب غير نقص المياه، أو المحرك حرارته طبيعية والكنترول بيقرا غلط. كل واحد ليه مجموعة أسباب مختلفة تمامًا.
إزاي أفرّق بين السخونة الحقيقية والقراءة الغلط؟
- 1الإنذار ظهر إمتى؟ بعد ثواني من تشغيل محرك بارد = قراءة غلط. بعد دقايق تحت حمل = غالبًا سخونة حقيقية.
- 2قيس حرارة جسم الثرموستات بترمومتر ليزر وقارنها بقراءة الكنترول.
- 3لو القراءتين مختلفتين: افصل فيشة الحساس. لو قراءة الكنترول اتغيّرت، السلك سليم والحساس هو المشكوك فيه.
- 4لو القراءة فضلت عالية والفيشة مفصولة: السلك عامل شورت على جسم المحرك.
- 5راجع نوع الحساس المضبوط في الكنترول، خصوصًا لو الحساس أو الكنترول اتغيّر قبل كده.
- 6لو القراءتين عاليين: نضّف ريش الردياتير، افحص سير المروحة، واتأكد إن الهوا السخن بيطلع بره الغرفة.
- 7بعدها افحص الثرموستات وطلمبة المياه وغطاء الردياتير، وراجع الحمل مقارنة بقدرة المولد.
سخونة حقيقية ولا قراءة غلط؟
| العلامة | سخونة حقيقية | قراءة غلط |
|---|---|---|
| توقيت الإنذار | بعد دقايق، وأسرع تحت الحمل | فورًا أو بعد ثواني من تشغيل بارد |
| قراءة ترمومتر مستقل | عالية برضه | طبيعية |
| شكل القراءة على الكنترول | بتطلع بالتدريج | بتنط مرة واحدة أو ثابتة على رقم |
| تأثير الجو والحمل | أسوأ في الحر والحمل العالي | مفيش علاقة |
| أول فحص | الردياتير، السير، تهوية الغرفة | الحساس، السلك، نوع الحساس المضبوط |
إزاي تعرف المحرك سخن فعلًا ولا لأ؟
قيس الحرارة بوسيلة مستقلة عن الكنترول: ترمومتر ليزر على جسم الثرموستات، أو عداد حرارة ميكانيكي لو موجود. لو القراءة المستقلة طبيعية والكنترول بيقول سخن، المشكلة في الحساس أو السلك أو الإعدادات. لو الاتنين عاليين، المحرك سخن فعلًا.
سخونة حقيقية: الهوا
ريش الردياتير مسدودة تراب وزيت، سير المروحة مرخي، أو الهوا السخن بيرجع يتسحب تاني جوه الغرفة بدل ما يطلع بره. ده أشهر سبب في مولدات الغرف المقفولة والكبائن، وبيظهر أكتر في الصيف وتحت الحمل العالي.
سخونة حقيقية: دورة المياه
ثرموستات معلّق على القفل، طلمبة مياه ضعيفة، خرطوم مخنوق، أو غطاء ردياتير مابيمسكش ضغط. في الحالات دي المياه موجودة بس مش بتلف كويس. المحرك بيسخن بعد دقايق من التحميل مش من أول التشغيل.
قراءة غلط: الحساس والسلك
في الحساسات المقاومة الشائعة المقاومة بتقل لما الحرارة تزيد. يعني السلك لو عمل شورت على جسم المحرك، الكنترول هيقرا حرارة عالية جدًا فورًا حتى والمحرك بارد. ودي علامة مميزة: إنذار حرارة بيظهر بعد ثواني من تشغيل محرك بارد مستحيل يكون سخونة حقيقية.
حساسات حرارة المياهقراءة غلط: نوع الحساس في الكنترول
كل نوع حساس ليه منحنى مقاومة مختلف. لو الحساس اتغيّر بنوع تاني، أو الكنترول اتنقل من مولد لمولد من غير ما نوع الحساس يتظبط، القراءة هتبقى غلط بثبات — ممكن تزيد عشرات الدرجات. راجع نوع الحساس المضبوط قبل ما تغيّر أي قطعة.
اختيار نوع الحساس لكل كنترولخطوات البرمجة والكتالوجات والأدوات المرتبطة
أسئلة شائعة
المولد بيفصل حرارة والمياه كاملة، ليه؟
المياه الكاملة مش معناها إنها بتلف: افحص الطرمبة والسير والرادياتير. ولو المحرك مش سخن فعلاً بالترمومتر، يبقى القراءة غلط: سلك حساس الحرارة لامس الأرضي، أو نوع الحساس المبرمج مش مطابق.
أفرّق إزاي بين حرارة حقيقية وحساس بايظ؟
قيس حرارة المحرك بترمومتر خارجي وقارنها بالشاشة. دليل SmartGen (قسم 13) ودليل DSE (قسم 10.3) بيقولوا: افحص حساس الحرارة وتوصيله، والقطبية المبرمجة، وتوافق الحساس مع البرمجة.
أدلة المصنعين المستخدمة في المقال
مرتبط بهذا المقال
مقالات أخرى قد تهمك
ماركات وقطاعات مرتبطة
محتاج فني للعطل ده في القاهرة أو الجيزة؟ صيانة وإصلاح كهرباء المولدات